పండుగ ప్రారంభం....
క్రీస్తు శకం 8వ శతాబ్దంలో, నాల్గవ గ్రెగోరి పోపుగారు రోము నగరంలో ఒక అద్భుతమైన సంప్రదాయానికి శ్రీకారం చుట్టారు. అదే రోమన్ కతోలిక శ్రీసభలో ‘సకల పునీతుల పండుగ’. నాటి నుండి ప్రతి సంవత్సరం నవంబర్ 1వ తేదీన విశ్వవ్యాప్తంగా శ్రీసభ ఈ పండుగను భక్తిశ్రద్ధలతో జరుపుకుంటూ వస్తోంది. అయితే, నాల్గవ శతాబ్దం నుండే, శ్రీసభలో క్రీస్తు నిమిత్తం ప్రాణాలర్పించిన హతసాక్షులందరి జ్ఞాపకార్థం పండుగను జరుపుకునేవారు. కాలక్రమేణా, కేవలం హతసాక్షులే కాక దేవుని మార్గంలో నడిచిన సకల పునీతులందరినీ స్మరించుకునే మహోత్సవంగా ఇది మారింది.

సకల పునీతులు అంటే ఎవరు?
ప్రపంచానికి అధికారికంగా ‘పునీత’ (Saint) బిరుదు ఇవ్వబడినవారే కాకుండా, దేవుని దృష్టిలో పవిత్రమైన జీవితాన్ని గడిపి, పరలోక రాజ్యానికి చేరుకున్న అంతులేని పునీత జన సమూహమే ఈ ‘సకల పునీతులు’. వీరు భూమిపై జీవించిన కాలంలో దేవుని మార్గాన్ని అనుసరించి, ఎన్నో శ్రమలను ఓపికతో భరించి, ఆయన ఇష్టానుసారంగా జీవించినవారే.

మత్తయి సువార్తలో (5:1-12) ప్రభువైన యేసు ప్రవక్తలను ఉద్దేశించి చెప్పినట్లుగానే, ఈ పునీతులు కూడా లోకంలో అనేక హింసలను, కష్టాలను ఎదుర్కొని, నేడు పరలోకంలో మహాదానందాన్ని అనుభవిస్తున్నారు. మనకు తెలిసిన పునీతులకంటే, మనకు తెలియనివారే దేవుని దృష్టిలో ఎంతోమంది ఉన్నారు. మన చుట్టూ సాధారణ జీవితం గడిపి, నిశ్శబ్దంగా దేవునికి తమ జీవితాలను అర్పించుకున్న ఎందరో నిస్వార్థజీవులు ఈ సకల పునీతుల జాబితాలో ఉంటారు.

పునీతుల సభ - ఆధ్యాత్మిక అనుబంధం
కతోలిక విశ్వాసంలో ‘పునీతుల సభ’ చాలా ప్రాముఖ్యమైనది. పరలోకంలో దేవుని సన్నిధిలో ఉన్న పునీతులు, భూలోకంలో విశ్వాస పోరాటం చేస్తున్న మనకు మధ్య ఉన్న అదృశ్య ఆధ్యాత్మిక వారధి ఇది. మనం భూమిపై ఎంతటి శ్రమల్లో ఉన్నా, పరలోకంలో ఉన్న పునీతులు మన యోగక్షేమాల కోసం, మన రక్షణ కోసం నిత్యం దేవునికి ప్రార్థనలు సమర్పిస్తూనే ఉంటారు.

మన మధ్యే నడయాడిన పునీతులు
ఎవరి జీవిత రహస్యాలు ఎవరికి తెలుసు? అది కేవలం సృష్టికర్త అయిన దేవునికి మాత్రమే ఎరుక. మొదట సాధారణ పాపులుగా జీవించి, ఆ తర్వాత దేవుని ప్రేమను గుర్తించి, పశ్చాత్తాపంతో తమ జీవితాలను మార్చుకున్నవారు కోకొల్లలు. నిందలు, అవమానాలు భరించి, క్రీస్తు అడుగుజాడల్లో నడిచి కన్నుమూసిన ప్రతి ఒక్కరూ దేవుని దృష్టిలో పునీతులే.

దీనికి చక్కటి ఉదాహరణే పునీత చిన్న తెరేసమ్మ జీవితం. అతి చిన్న వయస్సులోనే దేవునిపై అమితమైన ప్రేమను పెంచుకుని, కన్యస్త్రీగా తన జీవితాన్ని ఇతరుల సేవకే అంకితం చేశారు. తోటపని చేసుకుంటున్న సమయంలో బాలయేసు ఆమెకు సాక్షాత్కరించి ముచ్చటించడం ఆమె భక్తికి నిదర్శనం. తన మరణానికి ముందు ఆమె పలికిన ఈ మాటలు అక్షరసత్యాలు: “నా పరలోక జీవితాన్ని భూలోక వాసుల మేలుకోసమే ఉపయోగిస్తాను... నా మరణానంతరం రోజాపూల వర్షం కురిపిస్తాను!” క్షయరోగంతో అతి చిన్న వయస్సులోనే తుదిశ్వాస విడిచిన ఆమె, తన ఆత్మకథ అయిన “ఆత్మ యొక్క గాథ” ద్వారా నేటికీ లక్షలాది మందికి స్ఫూర్తినిస్తూనే ఉన్నారు. ఆమె మాట ఇచ్చిన ప్రకారమే, నేడు పరలోకంలో ఉండి భూమిపై ఉన్న మన యోగక్షేమాల కోసం, మన మంచి ప్రవర్తన కోసం నిత్యం ప్రార్థిస్తూనే ఉన్నారు.
పండుగ సందేశం.

సకల పునీతుల పండుగ కేవలం చర్చిలకే పరిమితమైనది కాదు. ఇది మనల్ని మనం సరిచూసుకునే ఒక గొప్ప అవకాశం. పునీతులందరినీ ఆదర్శంగా తీసుకొని, మనం కూడా తోటివారి యెడల ప్రేమ, క్షమాపణ, సఖ్యత కలిగి జీవించాలి. క్రీస్తు పేరిట మనం అనుభవించే ప్రతి చిన్న శ్రమకు పరలోకంలో గొప్ప ప్రతిఫలం ఉంటుంది. సౌలు పౌలుగా మారినట్లుగా, మనలో ఏవైనా బలహీనతలు ఉంటే వాటిని విడనాడి, పశ్చాత్తాప హృదయంతో దేవుని వైపు తిరగాలి. మన కళ్ల ముందే సాదాసీదా జీవితం గడిపి, ఇతరుల కోసం త్యాగాలు చేసి వెళ్లిన ఆ అజ్ఞాత పునీతుల ప్రార్థనా బలం నిత్యం మనకు తోడుగా ఉంటుంది.

ముగింపు ప్రార్థన
ఈ పవిత్ర దినాన సకల పునీతులందరినీ వేడుకుందాం: సకల పునీతులారా! మా కొరకు ప్రార్థించండి. మేము దేవునికి ఇష్టమైన బిడ్డలుగా జీవించేలా, మా హృదయాలను ఆయనకు అర్పించుకునేలా మమ్మల్ని నడిపించండి. ఒకవేళ మేము పాపపు మార్గంలో పయనిస్తే, పశ్చాత్తాపంతో తిరిగి నిజదేవుని చేరుకునే కృపను మాకు ప్రసాదించండి. ఆమెన్.
సకల పునీతులారా! మా కొరకు ప్రార్థించండి!