మెక్సికోలోని మొంటెర్రే అగ్ర పీఠం ఒక వినూత్నమైన ఆధ్యాత్మిక కార్యక్రమాన్ని ప్రారంభించింది.‘చాపెల్ ఆన్ వీల్స్’ పేరుతో ఒక ప్రయాణ వాహనాన్ని చిన్న ప్రార్థనా మందిరంగా మార్చి,చర్చిలు అందుబాటులో లేని ప్రాంతాల్లోని ప్రజల వద్దకు దివ్యకారుణ్య ప్రభువును తీసుకెళ్తున్నారు. ఈ వాహనంలో దివ్యకారుణ్య ఆరాధనకు ప్రత్యేక స్థలం, విశ్వాసులు పాప సంకీర్తన చేసుకునేందుకు ప్రత్యేక గది ఏర్పాటు చేశారు.మొత్తం 18 మంది ప్రయాణించగల ఈ వాహనాన్ని మూడు భాగాలుగా విభజించారు.వెనుక భాగంలో నలుగురు వ్యక్తులు దివ్యకారుణ్య సన్నిధిలో ప్రార్థించేందుకు అవకాశం ఉండగా,మధ్య భాగంలో పాప సంకీర్తన కోసం ఏర్పాట్లు చేశారు.ప్రజలు దేవాలయానికి వచ్చే వరకు ఎదురుచూడకుండా,దేవుని సన్నిధినే ప్రజల వద్దకు తీసుకెళ్లడం ఈ కార్యక్రమం ప్రధాన ఉద్దేశ్యం.దేవాలయాలు లేని ప్రాంతాల్లో కూడా దివ్యకారుణ్య ఆరాధనకు అవకాశం కల్పించాలనే ఆలోచనతో ఈ కార్యక్రమం ప్రారంభించబడిందని దీనికి బాధ్యత వహిస్తున్న ఫా. అడ్రియాన్ విలాగ్రాన్ గెరెరో తెలిపారు.ఈ వినూత్న ప్రయత్నానికి విశ్వాసుల నుంచి మంచి స్పందన లభిస్తోంది.