పునీత జోజప్పగారి పేరిట శ్రీసభ రెండు పండుగలను సూచించింది.మార్చి 19న జోజప్ప గారి మహోత్సవమయితే,మే 1వ తేదీన శ్రామికుడైన జోజప్ప గారిని భక్తులు స్మరణ చేసుకుంటారు.ఆయన స్వరూపంలోని వస్తువులు వివిధ విషయాలను మనకు గుర్తు చేస్తాయి.

1. వడ్రంగి-:
జోజప్ప గారిని వడ్రంగిగా మత్తయి పరిచయం చేశాడు: "ఇతడు వడ్రంగి కుమారుడు కాడా...." అంటూ యూదులు యేసును గురించి మాట్లాడుకోవడం మత్తయి వివరిస్తాడు (మత్తయి 13:55), తమ పరికరాల ద్వారా చెక్కపనులు చేసేవారు చక్కని రూపాలలో వస్తువులను తయారుచేస్తారు.జోజప్ప గారి జీవన వృత్తిని సూచించడానికి ఆయన చేతిలో ఈ వడ్రంగి పరికరాలు ఈయన తిరుకుటుంబాన్ని పోషించిన తీరును వివరిస్తాయి..

2.లిల్లీపుష్పాలు-:
తెలుపు వర్ణంలో ఉండే లిల్లీ పుష్పాలు జోజప్ప గారి పవిత్రతను,నిరాడంబరతను, విధేయతను సూచిస్తాయి: "యోసేపు, ప్రభువు దూత ఆజ్ఞాపించినట్లు తన భార్యను స్వీకరించెను" (మత్తయి 1:24). నిర్మలత్వాన్ని సూచించే ఈ పుష్పాలు- మరియమ్మకు, జోజప్ప గారికి మధ్యవున్న పవిత్రబంధాన్ని గుర్తుచేస్తాయి. పవిత్రమైన విరక్త జీవితంతో మరియమ్మపట్ల అతడు చూపిన గౌరవానికి ఈ పుష్పాలు నిదర్శనం:"ఆమెతో అతనికి ఎట్టి శారీరక సంబంధము లేదు"(మత్తయి 1:25).

3. పూలతో విరబూసిన కఱ్ఱ: ఇటువంటి వస్తువులు బైబిలులో కనుపించవు. అయితే బైబిలులో కనుపించని కొన్ని ముఖ్య విషయాలపై కూడా మొదటి శతాబ్ది క్రైస్తవులు ఆసక్తి చూపేవారు. ఈ గురుతు ద్వారా జోజప్పగారిని దేవుడు మరియ్యకు ఎన్నిక చేసిన భర్తగా గుర్తించేవారు.ఈ పోలిక బహుశా పాతనిబంధనలోని అహరోను కత్తి చిగురించడంతో పోలి ఉండవచ్చు.అలా ఆకులు వేసి,పూలు పూసిన అహరోను కఱ్ఱ అతనికి దేవుని ఎన్నికను సూచించింది (సంఖ్యా 17:1-13),పూలతో చిగురించిన కర్రను చేతిలో ధరించడం ద్వారా జోజప్పగారు దేవుని ఎన్నికను,పవిత్ర బాధ్యతను కలిగి ఉన్నాడని ఈ సూచిక గుర్తుచేస్తోంది.


4. బాలయేసు-:
జోజప్పగారి చేతిలో బాలుడైన యేసు కూర్చొని ఉన్నట్లు కొన్ని స్వరూపాలలో కనుపిస్తుంది. ఇది జోజప్పగారికి దేవుడు దయచేసిన పవిత్ర బాధ్యత (మత్తయి 2:19-23) బాలయేసుకు అతడు సాకుడు తండ్రిగా,రక్షణగా, పోషకుడుగా,నియమించబడినాడు.

5. దావీదు నక్షత్రము-: జోజప్పగారి దగ్గర దావీదు నక్షత్రం కనుపిస్తే ఇతడు దావీదు వంశస్థుడని,అబ్రహాము సంతతి వాడని గుర్తుంచుకోవాలి.జోజప్ప నీతిమంతుడే కాక విశ్వాసముగల యూదుడు (మత్తయి 1:19).దావీదు కుమారుడుగా ప్రస్తుతినందుకొన్నాడు (మత్తయి 1:20) యూదా మతాచారాలను,మోషే ధర్మశాస్త్రాన్ని విశ్వాసపాత్రంగా ఆచరించిన నమ్మకపాత్రుడైన యూదుడు (లూకా 2:24)

6. జతగువ్వలు:
జోజప్ప మరియమ్మలు బాలయేసును యెరూషలేము దేవాలయానికి తీసుకుపోయారు (లూకా 2:22-24) యూదయా సాంప్రదాయం ప్రకారం ఒక జత గువ్వలను బలి సమర్పణగా అర్పించారు.ఇవి పేదవారి బలిఅర్పణ కానుకలు (లేవి 14:22) ఈ జత గువ్వలు జోజప్ప గారి పేదరికాన్ని, సామాన్యజీవితాన్ని సూచిస్తాయి కూడా.