క్రిస్మస్ వెన్నెల
-----------------
ఇటు వెన్నెల అటు వెన్నెల ఎటు చూస్తే అటు వెన్నెల
పసి బాలుని ముసి నవ్వులు వెలిగించే సిరివెన్నెల
క్రిస్మసనుచు వచ్చునంట సంబరాలు నింపునంట
పసుల గాడి పానుపుగా కసవు మెత్త ఆనికగా
పవళించిన నెల రేడు వెలుగు విరజిమ్మునంట!

బోసి నోట వేలుంచిన లోకేశుడు శ్రీ యేసుడు
చీకట్లను పారద్రోలి శోకార్తుల ఓదార్చును
పసుల పాక ప్రసరించే వెండి వెలుగు జిలుగు తాకి
ఎద కలువలు వికసించును మోదమలర నర్తించును!

బేత్లెహేము పురపు తార కురియు నండి ప్రేమ ధార
వెలిగించునండి మనసుల్లో నిండుగా భక్తి జ్వాల
గుడి గంటల సవ్వడులే గుండె గుండె వినిపించగ
నిండిపోవు నలు దెసలా క్రీస్తు జనన సందడులే!