నిరీక్షణ దండ
మొదటి వారము - నిరీక్షణ

క్రీస్తు నందు ప్రియులారా! నిరీక్షణ కాలములో, నిరీక్షణ దండ ఒక ప్రత్యేక చిహ్నముగా ఏర్పాటు చేసుకుంటాము. నిరీక్షణ కాలములోని 5 వారాలలో, ఒక్కొక్క వారము ఒక్కొక్క ప్రత్యేక అంశముతో, కొవ్వొత్తిని వెలిగించుకుని, ఆ అంశాన్ని ధ్యానం చేస్తాము. నిరీక్షణ దండ వృత్తాకారంలో ఉంటుంది. సమస్తమునకు ఆధారము క్రీస్తే. ఇది దేవుని అనంత శక్తికి చిహ్నము. వృత్తాకారమునకు చుట్టబడిన ఆకుపచ్చని ఆకులు, అలంకరణ, ఆధ్యాత్మిక చిగురుకు చిహ్నము. ఒక్కొక్క కొవ్వొత్తి, ఆగమన కాలములోని ప్రత్యేక అంశాలను, దైవవాక్కు ప్రబోధాన్ని మనకు అందిస్తుంది. వెలుగుచున్న కొవ్వొత్తి, మనలో ఆధ్యాత్మిక ఉష్ణమును కలిగిస్తుంది. ఐదు కొవ్వొత్తులలో మూడు క్రవ్వొత్తులు ఊదా రంగులో, ఒకటి గులాబీ రంగులో, మరొకటి తెలుపు రంగులో ఉంటాయి. ఉదా రంగు నిరీక్షణకు చిహ్నము, గులాబీ రంగు ఆధ్యాత్మిక ఆనందమునకు చిహ్నము, తెలుపు రంగు క్రీస్తు జన్మకు చిహ్నము. ఈ నిరీక్షణ దండను, దేవాలయములోనూ, మన గృహాలలోనూ ఏర్పాటు చేసుకుంటాము. ఆధ్యాత్మిక చిహ్నములను ధ్యానిస్తూ, క్రీస్తు రాకడకై నిరీక్షించుదాం.

మొదటి వారము నిరీక్షణకు చిహ్నమైన కొవ్వొత్తిని వెలిగిస్తున్నాము. ఈ కొవ్వొత్తి ప్రవక్తల ప్రవచనాలను సూచిస్తుంది. క్రీస్తు రాకడను జ్ఞాపకం చేస్తుంది. ఊదా రంగులోని మొదటి కొవ్వొత్తిని వెలిగిస్తూ, నిరీక్షణ అనే అంశాన్ని ధ్యానిస్తున్నాము. రక్షకుని రాకడను ఆగమన కాలంలోని మొదటి వారము జ్ఞాపకం చేస్తుంది. ఈ వారంలో, ప్రభువు రాకడను ధ్యానిస్తూ, నిరీక్షణ అనే అంశం మీద ఆధారపడి, ప్రభువు సందేశాన్ని ఆలకిస్తాము. క్రీస్తు రెండవ రాకడకై నిరీక్షిస్తున్నాము. ఆయన మహిమాహితమైన సంపూర్ణ రాకడకై ఎదురు చూస్తున్నాము.

క్రీస్తు రాకడ గురించి ప్రవక్తలు ముందుగానే ప్రవచించారు. ఆ ప్రవచనాలను ధ్యానించినప్పుడు, దేవుని ప్రణాళికను అర్థం చేసుకుంటాము. దేవుడు తన ప్రమాణములను నిలబెట్టుకుంటాడు. ఆయన విశ్వసనీయుడు.

ఓ ప్రభువా! మీ రాకడకై నిరీక్షిస్తున్నాము. మాలో రక్షణ ఆశాభావాన్ని కలిగించండి. మాలో నుండి నిరుత్సాహాన్ని తీసివేయండి. మీరు మరలా మమ్ము మీతో పాటు తోడుకొని వెళ్లడానికి రానున్నారని విశ్వసిస్తున్నాము. మా నిరీక్షణ ఫలింప చేయండి. మీ రాకడ వరకు అప్రమత్తంగా ఉండేలా చేయండి. మేము, మా రక్షణ సమయం ఆసన్నమైనదని గుర్తించి, మీ హెచ్చరికలను సందేశంగా స్వీకరించి, మా జీవితాలను సంసిద్ధ పరచుకునేలా ప్రేరేపించండి. ఓ ప్రభువా! మీ రాకడకై నిరీక్షిస్తున్నాము. మీకే సదాకాలము మహిమ కలుగును గాక! ఆమెన్!

"మరనాత! ప్రభూ! రమ్ము!"
(1 కొరింతీ 16:22)