ప్రశ్న:
వివాహము చేసుకొనని గురువులకు, కన్యాస్త్రీలకు, కన్యాస్త్రీలకు కుటుంబీకులుపడే బాధలు,కష్టాలు అర్థమవుతాయా? కుటుంబ వ్యవస్థలో నున్న వారికి వీరు ఎలా సహాయపడగలరు?

సమాధానం -
గురువులకు, కన్యాస్త్రీలకు సుదీర్ఘమైన శిక్షణ ఉంటుంది. ఈ దీర్ఘకాలంలో అనేక విధములైన తర్ఫీదులతో ఆధ్యాత్మిక, మానసిక పరిణతి చెందిన వీరు, తప్పక కుటుంబ వ్యవస్థలోనున్న వారికి సహాయపడగలరు. కేవలం చదువు మాత్రమే కాకుండా ప్రజల జీవన విధానంలోని స్థితిగతులను అవగాహన చేసుకోవడానికి అనుభవాత్మక జ్ఞానాన్ని కూడా వారికి కలుగజేస్తారు. వీరికున్న జ్ఞానంతో కుటుంబంలోని సమస్యలను సహృదయంతో అర్ధంచేసుకొని సహాయపడతారు. అందుకు వివాహమే చేసికోనక్కరలేదు. ఒక వైద్యుడు ఉ న్నాడనుకుందాం! ఆ వైద్యుడు ఒక రోగిని బాగుచేయాలంటే, ఆ వ్యాధి అవగాహన కోసం, ఆ వ్యాధి వైద్యునికి తప్పనిసరిగా ఉండనవసరం లేదు కదా! అది లేకుండానే వైద్యుడు దానిని నయం చేయడానికి తగిన జ్ఞానాన్ని సంపాదించి ఉంటాడు. అతని చదువు, అందుకు అవసరమయిన అనుభవం ఆ పనితనాన్ని వృత్తిరీత్యా అతనికి నేర్పిస్తుంది. అటువంటిదే గురువులు కూడా చేయగలరు. ప్రజల కష్టాలను, బాధలను, భిన్న భావవజాలాలను, వైరుధ్యాలను, సమాజంలోని సంఘర్షణలను, వాటి తాలూకు ప్రకంపనలను అర్థం చేసికోగలరు. అన్నిటినీ మించి ఆధ్యాత్మిక శక్తితో ప్రజలకు వెన్నుదన్నుగా నిలిచిన వైనం గురుత్వ, మఠజీవితాలలో, చరిత్ర ఎరిగిన సత్యం. వారు పుట్టి పెరిగిన కుటుంబ, సామాజిక నేపథ్యం కూడా వారికి ఈ విషయంలో తోడ్పడుతుంది.