సామాన్య చివరి శనివారం
సువిశేష ధ్యానం
లూకా 21:34- 36
దైవార్చన సామాన్యకాల చివరి రోజులలో తల్లి శ్రీసభ తన బిడ్డలను అంత్యకాలమున జరుగబోవు "తుది తీర్పు"ను గూర్చి ధ్యానించమని ప్రేమపూర్వకముగ ఆహ్వానిస్తున్నది.మనిషికి మరణం తథ్యం.ఈ లోక అంతము కూడ సత్యం.మరణం తరువాత, మనం జీవించిన కాలంలో చేసిన కార్యాలను బట్టి తుది తీర్పు జరుగుతుంది.మనం ఈ జీవితంలో దేవుని చిత్తాన్ని ఎంత వరకు ఎలా నెరవేర్చామో అను దానిపైనే దేవుని తీర్పు ఆధారపడి ఉంటుంది.మరణం లేక లోకాంత్యము ఎప్పుడు సంభవించునో మనకు తెలియదు.ప్రభువు ఏ దినమున వచ్చునో మనకు తెలియదు (మత్తయి 24:42). కనుక జాగరూకులమై మెలకువ కలిగి ఆత్మీయంగా సంసిద్ధంగా ఉందాము.

ఈ లోక సంబంధమైన ఆశలతోను,శరీర వాంచలతోను, చీకు చింతలతోను జీవితంను కొనసాగించకుండ,ఆధ్యాత్మిక భావాలతోను దైవభక్తి,సోదర ప్రేమతో దేవుని చిత్తానుసారం జీవిస్తూ దేవుని కృపకు పాత్రులమగుటకు, ప్రయత్నించుదాము.రాబోవు దుర్ఘటలనుండి,శ్రమలనుండి రక్షణ పొందగలుగునట్లు,నిత్య జీవం పొందుటకు అవసరమగు శక్తి కొరకు నిరంతరం జాగరూకతతో పట్టుదలతో ప్రార్ధన చేద్దాము (కొలొస్సే, 4:2).వివేకవతులైన కన్యల వలె 'మనుష్య కుమారుని రాకడ కొరకు జాగరూకులమై ఎదురుచూద్దాం.తుది తీర్పునకు ఆధ్యాత్మికంగా సిద్ధపడుదాం. ప్రభువు రాజ్యమునకు అంతము లేదు.ప్రభువు పాలన శాశ్వతమైనది,సత్యమైనది, ప్రభువు కరుణకు పాత్రులమై కలకాలం ప్రభువుతో కలసి జీవించుటకు ప్రయాసపడుదాము,అప్పుడు ప్రభువును స్తుతించి సదా కీర్తింపవచ్చు.అటువంటి భాగ్యం ప్రభువు మనకు అనుగ్రహించునట్లు ప్రార్ధించుదాము.